کراچی: آغا خان یونیورسٹی (AKU) نے محکمہ صحت سندھ اور پیپلز پرائمری ہیلتھ کیئر انیشی ایٹو (PPHI) کے اشتراک سے اور گیٹس فاؤنڈیشن کے تعاون سے ٹنڈو اللہ یار ضلع میں بنیادی صحت کی ضروری خدمات کے پیکیج (EPHS) کے نفاذ کے دو سال مکمل ہونے پر صوبائی سطح کے ایک سمپوزیم کا انعقاد کیا۔ یہ تقریب 15 ستمبر کو آغا خان یونیورسٹی میں منعقد ہوئی، جس میں حکومتی حکام، ترقیاتی شراکت داروں اور فرنٹ لائن ہیلتھ ورکرز نے شرکت کی تاکہ پیش رفت کا جائزہ لیا جا سکے اور سندھ کے دیہی اضلاع میں اس ماڈل کو وسعت دینے پر تبادلہ خیال کیا جا سکے۔ تقریب میں سندھ کے 13 مختلف اضلاع کے نمائندے بھی موجود تھے۔
تقریباً 10 لاکھ آبادی پر مشتمل ضلع ٹنڈو اللہ یار، جس کی 78 فیصد آبادی دیہی علاقوں میں رہتی ہے، EPHS کے پائلٹ ضلع کے طور پر کام کر رہا ہے۔ EPHS نگہداشت کا 62 اقدامات پر مشتمل پیکیج ہے، جو کمیونٹی، بنیادی صحت اور فرسٹ لیول ہسپتالوں کی سطح پر فراہم کیا جاتا ہے۔ پروگرام کے آغاز کے بعد ضلع سندھ کا پہلا ضلع بن گیا جہاں DHIS2 اور EMR کے ذریعے روزانہ ڈیجیٹل ہیلتھ رپورٹنگ شروع کی گئی، ڈسٹرکٹ ہیڈکوارٹرز (DHQ) ہسپتال میں اسپیشلائزڈ کیئر نرسری قائم کی گئی، تقریباً 500 لیڈی ہیلتھ ورکرز کو طبی رہنما اصولوں پر تربیت دی گئی اور DHQ ٹنڈو اللہ یار میں پہلی مرتبہ جنرل اینستھیزیا کی خدمات متعارف کرائی گئیں، جو ہسپتال کی تاریخ میں پہلی مرتبہ ہے۔
55 سے زائد صحت مراکز کے عملے کو ڈیجیٹل رپورٹنگ کے حوالے سے تربیت دی جا چکی ہے، جبکہ ضلع کے 55 صحت مراکز میں سے بتدریج زیادہ مراکز اب حقیقی وقت میں رپورٹنگ کر رہے ہیں۔ DHQ ہسپتال میں نئی اسپیشلائزڈ کیئر نرسری میں خصوصی تربیت یافتہ 9 ڈاکٹرز، نرسز اور ٹیکنیشنز خدمات انجام دے رہے ہیں، جس سے ضلع میں نوزائیدہ بچوں کے لیے انتہائی نگہداشت کی وہ صلاحیت پیدا ہوئی ہے جو اس سے قبل موجود نہیں تھی۔ جراحی کی خدمات میں بھی توسیع کی گئی ہے اور اب تقریباً 30 فیصد طبی طریقۂ کار جنرل اینستھیزیا کے تحت انجام دیے جا رہے ہیں۔ یہ خدمات اس سے قبل ضلع میں دستیاب نہیں تھیں۔
سندھ حکومت کی وزیر صحت و آبادی بہبود ڈاکٹر عذرا فضل پیچوہو نے کہا ’’مجھے امید ہے کہ اس عملدرآمد کو صرف ٹنڈو اللہ یار تک محدود نہیں رکھا جائے گا۔ ظاہر ہے، ہم ایک ایسا ماڈل چاہتے ہیں جسے وسعت دی جا سکے اور جو پائیدار بھی ہو، کیونکہ اکثر ایسا ہوتا ہے کہ جب کوئی مداخلت ختم ہو جاتی ہے اور اسے چلانے والے افراد ضلع سے منتقل ہو جاتے ہیں تو بہت سی چیزیں نظر انداز ہو جاتی ہیں۔ ہم بالکل یہی صورتحال پیدا ہونے سے روکنا چاہتے ہیں۔ پائیداری کو آغاز ہی سے پروگرام کا حصہ بنانا ہوگا۔‘‘
