اسلام آباد: وفاقی وزیر برائے بحری امور محمد جنید انوار چوہدری نے صاف اور پائیدار سمندری ماحول کے قیام کے حکومتی عزم کا اعادہ کرتے ہوئے کہا ہے کہ آلودگی سے پاک بندرگاہیں محفوظ جہاز رانی اور معاشی ترقی کے لیے نہایت اہم ہیں۔
پیر کے روز اپنے ایک بیان میں وفاقی وزیر بحری امور نے کراچی پورٹ ٹرسٹ کے میرین پولوشن کنٹرول ڈیپارٹمنٹ کی حالیہ ہفتہ وار صفائی مہم کی کارکردگی کو سراہا، جس کے دوران حساس بندرگاہی علاقوں سے 16 ہزار 430 کلوگرام ٹھوس کچرا جمع کیا گیا۔ اس کچرے میں پلاسٹک کا ملبہ، تیرتا ہوا فضلہ، نامیاتی کچرا اور استعمال شدہ ماہی گیری کا سامان شامل تھا، جو سمندری ماحولیاتی نظام، بندرگاہی سرگرمیوں اور ساحلی حیاتیاتی تنوع کے لیے خطرہ بن رہے تھے۔
انہوں نے بتایا کہ صفائی مہم کے دوران ڈمپنگ و ٹرانسفر سائٹ، ایسٹ وارف، ویسٹ وارف اور بوٹ بیسن جیٹی سمیت اہم مقامات کو ہدف بنایا گیا، جہاں جہازوں کی آمدورفت، کارگو ہینڈلنگ اور شہری ٹریفک کے باعث آلودگی کے خطرات میں اضافہ ہوتا ہے۔ اس آپریشن میں 54 کشتیوں اور 164 اہلکاروں نے مختلف شفٹوں میں حصہ لیا تاکہ تمام علاقوں کی مؤثر صفائی یقینی بنائی جا سکے۔
وفاقی وزیر نے کہا کہ جمع کیے گئے تمام کچرے کو ماحولیاتی ضوابط کے مطابق سندھ سالڈ ویسٹ مینجمنٹ بورڈ کے گاربیج ٹرانسفر اسٹیشن منتقل کیا گیا، جبکہ ثانوی آلودگی سے بچاؤ کے لیے حفاظتی اصولوں پر مکمل عملدرآمد کیا گیا۔
جنید انوار چوہدری کا کہنا تھا کہ بندرگاہوں کی مسلسل صفائی سے جہازوں کی آمد و رفت آسان ہوتی ہے، خطرات میں کمی آتی ہے اور تجارتی سرگرمیوں کو فروغ ملتا ہے۔ انہوں نے کراچی بندرگاہ کے چئیرمین ایڈمرل شاہد احمد کی قیادت کو سراہتے ہوئے مستقبل کے منصوبوں کا بھی ذکر کیا، جن میں جدید کچرا جمع کرنے والے آلات اور مانیٹرنگ نظام کی تنصیب شامل ہے۔
انہوں نے مزید کہا کہ یہ اقدامات ماحولیاتی تحفظ کے حوالے سے کے پی ٹی کے فعال کردار کی عکاسی کرتے ہیں، جو پاکستان کے پائیدار بحری اہداف اور بین الاقوامی ذمہ داریوں سے ہم آہنگ ہیں۔ ان کا کہنا تھا کہ حکومت سمندری حیات کے تحفظ، محفوظ جہاز رانی اور صاف بندرگاہ کے قیام کے لیے تمام شراکت داروں کے تعاون اور عوامی آگاہی کے ذریعے اپنی کوششیں جاری رکھے گی۔
آلودگی سے پاک بندرگاہیں معاشی ترقی اور محفوظ بحری ماحول کے لیے ناگزیر ہیں: جنید انوار چوہدری
