کراچی: سلیکٹ ٹیکنالوجیز لمیٹڈ (SELECT)، جو اسمارٹ فونز اور کنزیومر ایپلائنسز کی تیاری اور اسمبلی سے وابستہ پاکستان کی ایک نمایاں ٹیکنالوجی کمپنی ہے، نے اپنی ابتدائی عوامی پیشکش (IPO) کامیابی سے مکمل کر لی ہے۔ بک بلڈنگ اور جنرل پبلک سبسکرپشن، دونوں مراحل میں سرمایہ کاروں کی جانب سے اسے بھرپور پذیرائی حاصل ہوئی۔
اس IPO کے ذریعے 3.02 ارب روپے حاصل کیے گئے، جو اسے پاکستان کے ٹیکنالوجی شعبے کی نمایاں ترین ایکویٹی پیشکشوں میں شامل کرتا ہے۔ یہ پیشکش 88.9 ملین عام حصص پر مشتمل تھی، جو سلیکٹ کے بعد از اجراء ادا شدہ سرمائے کے 10 فیصد کے برابر ہیں۔
IPO کی فلور پرائس 28.00 روپے فی حصص مقرر کی گئی تھی۔ بک بلڈنگ کے عمل کے دوران بھرپور طلب کے نتیجے میں اسٹرائیک پرائس 34.00 روپے فی حصص دریافت ہوئی، جو فلور پرائس سے 21 فیصد زائد ہے۔
IPO میں سرمایہ کاروں کے ایک وسیع اور متنوع حلقے نے شرکت کی، جن میں کمرشل بینک، میوچل فنڈز، انشورنس کمپنیاں، انویسٹمنٹ بینک، پنشن اور ملازمین کے فنڈز، بروکریج ہاؤسز، ہائی نیٹ ورتھ افراد، کارپوریٹ سرمایہ کار اور ریٹیل سرمایہ کار شامل تھے۔ یہ شرکت سلیکٹ کی کاروباری بنیادوں، حکمتِ عملی اور طویل مدتی امکانات پر وسیع البنیاد اعتماد کی عکاسی کرتی ہے۔
سلیکٹ کے IPO کی کامیاب تکمیل پاکستان کی سرمایہ منڈیوں کی بڑھتی ہوئی گہرائی اور ملک کے پھیلتے ہوئے ٹیکنالوجی و مینوفیکچرنگ نظام میں کام کرنے والی کمپنیوں کے لیے سرمایہ کاروں کی بڑھتی ہوئی دلچسپی کو نمایاں کرتی ہے۔ یہ اُن کاروباری اداروں پر اعتماد کو بھی تقویت دیتی ہے جو مقامی مینوفیکچرنگ، درآمدی متبادل، اور اعلیٰ معیار کی ”میڈ اِن پاکستان“ ٹیکنالوجی مصنوعات کے فروغ میں اپنا کردار ادا کر رہے ہیں۔
IPO سے حاصل ہونے والی رقم سلیکٹ کے تزویراتی ترقیاتی اقدامات میں معاون ثابت ہوگی، جن میں مینوفیکچرنگ صلاحیتوں میں توسیع، مصنوعات کی جدت کو مضبوط بنانا، اور مارکیٹ میں اپنی موجودگی کو وسعت دینا شامل ہے، تاکہ کمپنی پاکستانی مارکیٹ کے لیے جدید ترین اسمارٹ فونز اور کنزیومر ایپلائنسز فراہم کرتی رہے۔
جناب فرخ ایچ سبزواری، مینیجنگ ڈائریکٹر و چیف ایگزیکٹو آفیسر پاکستان اسٹاک ایکسچینج نے کا کہنا تھا کہ سلیکٹ ٹیکنالوجیز لمیٹڈ کو پاکستان اسٹاک ایکسچینج میں خوش آمدید کہنا میرے لیے باعثِ اعزاز ہے۔ گھنٹہ بجانے کی یہ تقریب نئے مالی سال کی پہلی لسٹنگ ہے، اور یہ ایک نہایت موزوں آغاز ہے ایک ایسی کمپنی جو یہیں پاکستان میں اعلیٰ معیار کی ٹیکنالوجی پر مبنی مصنوعات ڈیزائن اور تیار کر رہی ہے۔
یہ لسٹنگ ایکسچینج کے لیے ایک سنگِ میل سال کے بعد عمل میں آ رہی ہے۔ مالی سال 2026 میں 11 آئی پی اوز ہوئے — جو گزشتہ 25 برسوں میں تیسری بلند ترین تعداد ہے — جن کے ذریعے 66 ملین امریکی ڈالر حاصل کیے گئے، جبکہ 537 لسٹڈ کمپنیوں پر مشتمل مارکیٹ میں اوسط یومیہ تجارتی حجم 205 ملین امریکی ڈالر (تقریباً 57 ارب روپے) کی بلند ترین سطح پر پہنچ گیا۔ جنوری 2026 میں مارکیٹ کیپٹلائزیشن ریکارڈ 21 ٹریلین روپے تک پہنچی، اور سال کے اختتام پر یہ 20.20 ٹریلین روپے رہی، جو جی ڈی پی کے 16 فیصد کے مساوی ہے۔ سب سے زیادہ حوصلہ افزا امر شراکت کے بڑھتے ہوئے دائرے کا ہے۔ سرمایہ کاروں کی تعداد بلند ترین سطح یعنی 583,052 اکاؤنٹس تک پہنچ گئی، اور ماہانہ اوسطاً تقریباً 16,000 نئے اکاؤنٹس کھولے گئے، جبکہ گزشتہ سال یہ اوسط 5,290 تھی۔
کے ایس ای-100 انڈیکس نے اپنے آغاز سے اب تک امریکی ڈالر کے اعتبار سے 8.2 فیصد سالانہ منافع دیا ہے، اور گزشتہ تین برسوں میں ڈالر کے اعتبار سے 64 فیصد سالانہ منافع دیا ہے، جس کی بنیاد پر یہ تین سالہ منافع کے لحاظ سے خطے کی بہترین کارکردگی دکھانے والی مارکیٹ ہے۔ ہماری مارکیٹ استحکام اور طویل مدتی ترقی، دونوں کا مظاہرہ کر رہی ہے۔ ہم سلیکٹ ٹیکنالوجیز لمیٹڈ اور ایئر لنک گروپ کی انتظامیہ کو مبارکباد پیش کرتے ہیں، اور بطور لسٹڈ کمپنی اُن کی کامیابی کے لیے نیک تمناؤں کا اظہار کرتے ہیں۔“
جناب ذیشان رحمان خٹک، کمشنر سیکیورٹیز اینڈ ایکسچینج کمیشن آف پاکستان نے کہا: ”ایس ای سی پی لسٹنگ کے عمل کو آسان اور بلا رکاوٹ بنانے کے لیے پُرعزم ہے، کیونکہ آئی پی اوز کمپنیوں کے لیے ترقی کا ایک حقیقی راستہ ہیں۔ ہم ریگولیٹری تقاضوں اور سرمایہ کاروں کے تحفظ کے درمیان توازن برقرار رکھے ہوئے ہیں، اور ساتھ ہی مستقبل بین شعبوں کو سرمایہ منڈیوں تک رسائی کی ترغیب دے رہے ہیں۔ سلیکٹ ٹیکنالوجیز لمیٹڈ کی لسٹنگ پاکستان کی معیشت میں تنوع اور سرمایہ منڈی کے نظام کو مضبوط بنانے کی جانب قابلِ تحسین پیش رفت کی عکاس ہے۔“
اس اہم سنگِ میل پر تبصرہ کرتے ہوئے جناب اسلم ایچ پراچہ، چیئرمین ایئر لنک کمیونیکیشن لمیٹڈ نے کہا: ”پاکستان اسٹاک ایکسچینج میں آج گھنٹہ بجانے کی تقریب سلیکٹ ٹیکنالوجیز لمیٹڈ اور ایئر لنک گروپ کے لیے ایک اہم سنگِ میل ہے۔ ہماری کامیاب لسٹنگ ہماری حکمتِ عملی اور صلاحیتوں پر سرمایہ کاروں کے مضبوط اعتماد کی عکاسی کرتی ہے۔ ہم طرزِ حکمرانی اور شفافیت کے بلند ترین معیارات کے لیے پُرعزم ہیں۔ یہ قدم پاکستان کی سرمایہ منڈیوں کے ساتھ ہماری شراکت داری کو مزید مستحکم کرتا ہے۔ ہم اپنے سرمایہ کاروں، ایس ای سی پی اور پی ایس ایکس کے مسلسل تعاون پر اُن کے شکرگزار ہیں۔“
جناب عدنان آفتاب، چیف ایگزیکٹو آفیسر سلیکٹ ٹیکنالوجیز لمیٹڈ نے کہا: ”پی ایس ایکس میں سلیکٹ ٹیکنالوجیز لمیٹڈ کی لسٹنگ ہماری پوری ٹیم کے لیے ایک قابلِ فخر لمحہ ہے۔ یہ کنزیومر ٹیکنالوجی کے شعبے میں ایک نمایاں مقامی مینوفیکچرر کے طور پر ہمارے سفر کی توثیق کرتی ہے۔ ہمارا ہدف اپنے شیئر ہولڈرز کو پائیدار اور طویل مدتی قدر فراہم کرنا ہے۔ ہماری توجہ جدت، معیار اور صارفین کے اعتماد پر مرکوز ہے۔ یہ سنگِ میل ہمیں پاکستان کی صنعتی ترقی میں اس سے بھی بڑا کردار ادا کرنے کا حوصلہ دیتا ہے۔“
جناب شاہد علی حبیب، چیف ایگزیکٹو آفیسر عارف حبیب لمیٹڈ نے کامیاب آئی پی او پر تبصرہ کرتے ہوئے کہا: ”ہمیں خوشی ہے کہ ہم نے سلیکٹ ٹیکنالوجیز لمیٹڈ کا آئی پی او کامیابی سے مکمل کیا۔ ادارہ جاتی اور ریٹیل، دونوں طرح کے سرمایہ کاروں کی جانب سے بھرپور ردِعمل، جس کے نتیجے میں پیشکش 3.23 گنا زائد سبسکرائب ہوئی، سلیکٹ کے کاروباری ماڈل اور ترقی کی صلاحیت پر مارکیٹ کے اعتماد کی عکاسی کرتا ہے۔ آئی پی او میں تقریباً 13,000 سرمایہ کاروں نے حصہ لیا، جو پاکستان کی سرمایہ منڈی کی بڑھتی ہوئی گہرائی اور اعتماد کو ظاہر کرتا ہے۔ ہم سلیکٹ ٹیکنالوجیز لمیٹڈ کی انتظامیہ کو اس کامیاب ٹرانزیکشن پر مبارکباد پیش کرتے ہیں، اور تمام سرمایہ کاروں اور اسٹیک ہولڈرز کے مسلسل اعتماد اور تعاون پر دل سے اُن کے شکرگزار ہیں۔“
