اسلام آباد، 18 مارچ 2026: کمپٹیشن کمیشن آف پاکستان (سی سی پی) نے کمپٹیشن ایکٹ 2010 کے تحت جائزہ لینے کے بعد داؤد گروپ کے اندر کارپوریٹ تنظیمِ نو کے حصے کے طور پر ایک مرجر کی منظوری دے دی ہے۔ اس لین دین میں سیان لمیٹڈ اور ڈی ایچ پارٹنرز لمیٹڈ کا داؤد لارنس پور لمیٹڈ میں انضمام شامل ہے۔
منظور شدہ لین دین 16 دسمبر 2025 کی اسکیم آف امیلگمیشن سے متعلق ہے، جس کے تحت سیان لمیٹڈ اور ڈی ایچ پارٹنرز لمیٹڈ کو داؤد لارنس پور لمیٹڈ میں ضم کیا جائے گا۔ اس انتظام کے تحت ان کمپنیوں کے تمام اثاثے، واجبات اور ذمہ داریاں ڈی ایل ایل میں منتقل ہو جائیں گی، جبکہ داؤد لارنس پور لمیٹڈ کے حصص سیان لمیٹڈ اور ڈی ایچ پارٹنرز لمیٹڈ کے شیئر ہولڈرز کو جاری کیے جائیں گے۔
اپنے فیز ون مسابقتی جائزے میں کمیشن نے مشاہدہ کیا کہ تینوں کمپنیاں بنیادی طور پر سرمایہ کاری کے پلیٹ فارمز کے طور پر کام کرتی ہیں اور مختلف شعبوں میں سرمایہ کاری کا انتظام کرتی ہیں۔ مجوزہ لین دین داؤد گروپ کے اندرونی تنظیمِ نو کا حصہ ہے کیونکہ یہ تمام ادارے ایک ہی انتظامی کنٹرول کے تحت منسلک کمپنیاں ہیں۔
دستیاب معلومات کا جائزہ لینے کے بعد کمیشن نے یہ نتیجہ اخذ کیا کہ یہ انضمام نہ تو کسی غالب حیثیت کو جنم دے گا اور نہ ہی متعلقہ مارکیٹ میں مسابقت کو نمایاں طور پر کم کرے گا۔ لہٰذا اس مرجر سے مسابقتی خدشات پیدا ہونے کا امکان نہیں۔ چنانچہ کمیشن نے کمپٹیشن ایکٹ 2010 کے سیکشن 31کے تحت اس لین دین کی منظوری دے دی۔
اس نوعیت کی کارپوریٹ تنظیمِ نو سرمایہ کاری کے انتظام میں کارکردگی بہتر بنانے اور ادارہ جاتی سرمایہ کاری کی صلاحیت کو مضبوط کرنے میں معاون ثابت ہو سکتی ہے۔ سی سی پی اپنے جائزے کے ذریعے یہ یقینی بناتا ہے کہ ایسے لین دین مسابقتی اصولوں کے مطابق ہوں اور مارکیٹ کے توازن پر منفی اثر نہ ڈالیں۔
